დახმარების ცენტრი

ამანათი ჯერ აშშ-ში, ჩვენს საწყობში ჩადის. საწყობში მიწოდების დრო ინდივიდუალურია და მითითებულია თითოეული პროდუქტის აღწერაში. საწყობში ამანათებს გადაახარისხებენ და გაამზადებენ ტრანსპორტირებისთვის. აშშ-დან ამანათები იგზავნება სამშაბათობით და პარასკევობით და ჩამოდის 7 დღეში.

ამანათის მისაღებად, პირველ რიგში, იხდით პროდუქტის ღირებულებას. აშშ-ს საწყობში მიწოდების შემდეგ, მის გატანამდე — ტრანსპორტირების საფასურს. ხოლო თუ პროდუქტი ექვემდებარება განბაჟებას, გადმოგეცემათ საბაჟო დეკლარაცია, რომელიც ერთი თვის განმავლობაში უნდა დაიფაროს.

აშშ-ის საწყობში ანგარიშობენ ამანათის წონას. ავიაკომპანია ტრანსპორტირების ღირებულებას ითვლის მხოლოდ რეალური წონის მიხედვით: 1 კგ = $8-ის ექვივალენტს ლარში, და წონა მრგვალდება 100 გრამის სიზუსტით.

სახელმწიფო განბაჟებას ექვემდებარება:

• ერთ რეისზე გამოგზავნილი ამანათები, რომელთა საერთო ღირებულება მეტია 300 ლარზე;
• ერთ რეისზე გამოგზავნილი ამანათები, რომელთა საერთო წონა მეტია 30 კილოგრამზე;
• 4-ზე მეტი ერთგვაროვანი ამანათი, თუ ჩაითვალა, რომ კომერციული დანიშნულება აქვს;
• 400 ღერზე მეტი სიგარეტი;
• 50-ზე მეტი სიგარა;
• 50-ზე მეტი სიგარილა;
• 250 გრამზე მეტი თამბაქოს ნაწარმი;
• 4 ლიტრზე მეტი ალკოჰოლური სასმელი.

საბაჟო გადასახადი შეადგენს ჩამოტანილი ნივთისა და ტრანსპორტირების ღირებულების ჯამის 18%-ს. საბაჟო გადასახადის გადახდა შესაძლებელია 30 კალენდარული დღის განმავლობაში ნებისმიერ ბანკში. განბაჟებისათვის საჭირო ყველა დოკუმენტს მიიღებთ ამანათის გატანისას.

ნივთის შეძენისას სისტემა მოგთხოვთ სასურველი ფილიალის მისამართის მითითებას. საქართველოში ჩამოტანილი ამანათი მივა თქვენს მიერ არჩეულ ოფისში, რის შესახებაც მობილურ ტელეფონზე მოგივათ შეტყობინება.

შენიშვნა: აუცილებელია ჩამოსვლიდან 30 დღეში გაიტანოთ ამანათი. წინააღმდეგ შემთხვევაში ის სახელმწიფოს გადაეცემა.

აკრძალულია შემდეგი ნივთების ტრანსპორტირება:

• რეალური ფული, მონეტები ან ბანკნოტები;
• საბანკო და საკრედიტო ბილეთები და სხვა ფასიანი ქაღალდები;
• საკვები პროდუქცია;
• ფეთქებადი ნივთიერებები ან პროდუქცია (სპრეი, პულვერიზატორი, დეზოდორანტი და მსგავსი შეფუთვა);
• მიწა და ნერგები მიწით;
• პორნოგრაფიული სახის პროდუქცია;
• ცოცხალი ცხოველები;
• ნებისმიერი სახის ნარკოტიკი, ნარკოტიკული ნივთიერებების შემცველი პროდუქცია, მცენარეები ან მათი თესლი, ე.წ. „ბიო“ არომატიზატორი;
• ფსიქოტროპიული ნივთიერებები;
• წამლები (10 შეკვრაზე მეტი);
• მცენარეები (1 კილოგრამზე მეტი);
• მცენარეების თესლები (25 გრამზე მეტი);
• არბალეტები, ისრები, მშვილდები;
• პნევმატური იარაღები, რომელთა კალიბრი აღემატება 4.5 მმ-ს.

სხვა პიროვნებას შეუძლია გაიტანოს ამანათი, თუ ის არ ექვემდებარება განბაჟებას. ამისთვის უნდა წარადგინოს საკუთარი და ამანათის მფლობელის პირადობის დამადასტურებელი საბუთი (ID ბარათი, პასპორტი ან მართვის მოწმობა) ან მისი ასლი.

სასურველი ნივთის შეძენამდე აუცილებლად შეამოწმეთ შემდეგი ინფორმაცია:

1. დეტალური ინფორმაცია ნივთის შესახებ — მდგომარეობა, მიწოდების დრო, მონაცემები და აღწერა.

შენიშვნა: ნივთის შესახებ ძირითადი ინფორმაცია მოცემულია ჩვენს ვებ-გვერდზე, თუმცა მომხმარებელი ვალდებულია გაეცნოს სრულ აღწერას eBay.com-ზე. ყველა ნივთის გვერდზე არის მითითებული eBay.com-ზე გადასასვლელი ლინკი. სხვადასხვა კატეგორიის პროდუქტებისათვის იყენებენ განსხვავებულ ნივთის მდგომარეობის აღმნიშვნელ ტერმინებს; ტერმინების განმარტებები ქართულ ენაზე მითითებულია თითოეული ნივთის გვერდზე.

2. გამყიდველი — რეიტინგი, გაყიდვების რაოდენობა და მომხმარებლების შეფასება. ჩვენ გირჩევთ, რომ სასურველი ნივთი შეიძინოთ გამყიდველისგან, რომლის შეფასებების 95%-ზე მეტი დადებითია და გაყიდული აქვს 100-ზე მეტი ნივთი.

შეკვეთის განხორციელების შემდეგ ნივთის ფასი და ამერიკაში ტრანსპორტირების ღირებულება ავტომატურად გადაერიცხება გამყიდველს. გამყიდველი ვალდებულია ნივთი მიაწოდოს აშშ-ში ჩვენს საწყობს იმ აღწერილობით, ფორმითა და რაოდენობით, რაც მას ჰქონდა მითითებული ვებ-გვერდზე. ამანათის საწყობში მიწოდებაზე პასუხისმგებლობა ეკისრება გამყიდველს.

თუ ნივთი არ მიეწოდა საწყობს საიტზე მითითებულ დროში, გადაცილებული დროიდან 10 დღის განმავლობაში მომხმარებელი უნდა დაგვიკავშირდეს და წერილობით გვაცნობოს ამის შესახებ. ჩვენ მივწერთ eBay.com-ზე გამყიდველს ამ პრობლემის შესახებ. ამ შემთხვევაში გამყიდველი 5 დღის განმავლობაში მიიღებს გადაწყვეტილებას ნივთის ახლიდან გამოგზავნის ან ფულის დაბრუნების შესახებ. თუ გამყიდველი არ უპასუხებს მოთხოვნას, eBay.com-ის ადმინისტრაცია ჩაერთვება განხილვაში და საჭიროების შემთხვევაში დააბრუნებს ფულს შემკვეთის ანგარიშზე.

თუ ნივთი გამოიგზავნება და საქართველოში ჩამოვა დაზიანებული ან აღწერისგან განსხვავებული, მომხმარებელი ვალდებულია წერილობითი ფორმით დაგვიკავშირდეს ამ პრობლემის შესახებ ნივთის გატანიდან 36 საათის განმავლობაში. ჩვენ მივწერთ eBay.com-ზე გამყიდველს აღნიშნული პრობლემის შესახებ. შესაძლებელია გამყიდველმა ნაწილობრივ აანაზღაუროს მიყენებული ზიანი ან მოითხოვოს ნივთის დაბრუნება ანაზღაურების მიზნით. თანხის დაბრუნების შემთხვევაში ვებ-გვერდის ბალანსზე აისახება დაბრუნებული თანხა ლარში.

დაწვრილებით იხილეთ მოხმარების წესების 3.8–3.15 პუნქტები: https://ebg.ge/terms